గజల్ కాన్వాస్....42...రచన..డా. శ్యామలగడ్డం.....26-01-2016
నెలరాజూ కిరణాలలొ మననెలవును కోరుకుంట
చలువ రాతి మేడలోనె మన గూడును కోరుకుంట
గోధూళీ వేళలోన మన ప్రేమను పంచుకుంటు
వ్యాహ్యాళిగ నందనమున తిరుగాటను కోరుకుంట
ప్రేమాలయ దీపముగా నీ మనసున నేనుంటూ
కఠినమైన హృదయమునా స్పందననూ కోరుకుంట
వేదనలే అరువిచ్చీ మమతలనే పెంచుకుంటు
జీవితాన మరువరాని అమృతమును కోరుకుంట
కుటుంబమే జలధిగాను ముత్యాలే యేరుకుంటు
మనసారా వసుధైకా కుటుంబమును కోరుకుంట
చిత్రకవితామంజరి...
మేఘాలా దొంతరలో తేలియాడు చెలికాడా
యవనాశ్వమునెక్కినీవు వచ్చెదవా చెలికాడా
జ్యోత్స్నాభిసారికలా ఎదురుచూసితిన్నాళ్ళూ
కలలలోనా నినుచేరా సాగితిరా చెలికాడా
శిశిరములో వసంతమై వచ్చెదవా వేగముగా
విరహాగ్నికి తుషారముగ రావేలా చెలికాడా
అనురాగపు మధురిమలు కురిపించగ లాలనతో
ప్రేమసుమమునందీయగ కదిలావా చెలికాడా
నీ మనసున మల్లెలు నే పూయించెద తమితీరా
శ్యామ శ్వాస నిలిపేలా నిలిచితివా చెలికాడా.....
డా. శ్యామలగడ్డం.....25.01.2017....
ముషాయిరా గజల్..రచన. డా..శ్యామలగడ్డం..14-07-2016..
స్వచ్ఛమైన ప్రేమ తెలిపె మనసెక్కడ దొరుకుతుంది
ఏ ఫలమూ ఆశించని చెలిమెక్కడ దొరుకుతుంది
కనులనిండ నీరుండగ కనురెప్పలు బరువవులే
అశ్రువులను దాచుకోను చోటెక్కడ దొరుకుతుంది
పచ్చకోక కట్టుకున్న భూమాతకు సంబరమే
నీలాంబరి నందుకోగ మెట్టెక్కడ దొరుకుతుంది
మనసు గుచ్చు మాటలతో నొచ్చుకుంటె అది మేలా
సరసమైన సంభాషణ తీరెక్కడ దొరుకుతుంది
కులమతాల గోడలన్ని తీసివేయ పాటుపడగ
ఏ వర్గానికి చెందని మనసెక్కడ దొరుకుతుంది
మనసు మూగదయినపుడూ భాషకూడ రాకుండును
రాగసుధలు కురిపించే ప్రేమెక్కడ దొరుకుతుంది
హృదయములో వేదనంత వెల్లువగా పొంగుతోంది
మనసుగోడు వినేందుకు చెలిమెక్కడ దొరుకుతుంది
డా. శ్యామలగడ్డం...14-07-2016...
