మనసులోని మంచియొకటి వెలుగుదారి కావాలీ /
మాటలోని మధురిమలో మమత ఒకటి కావాలీ //
ఆకసాన చందమామ వెన్నెలొకటి చాలదులే /
తారలతో చందురూని వెలుతురొకటి కావాలీ //
వనములోన సుగంధాల విరిజల్లులు ఎందుకనీ /
మనిషిలోన మరువలేని సుగుణమొకటి కావాలీ //
వైభవంగ ఉండాలని తపనపడుట ఎందుకనీ /
ఉన్నంతలొ సంతృప్తిగ గడుపుటొకటి కావాలీ //
పగలురేయి ఉండునులే అవనిపైన ఓ శ్యామా /
జీవితాన్ని ఎదుర్కొనే ధైర్యమొకటి కావాలీ //
---------------------------------------------------------------------
డా. జి. శ్యామల-------11-09-2015
అక్షర సమస్యా పూరణం...డా.శ్యామలగడ్డం..21-08-2018...
±++++++++++++++++++++++++++++++++++++++
జలప్రళయము సంభవించె కేరళమునందునను
వరదలందున సర్వము పోగొట్టుకొనిరి జనులు,
ముక్కంటి తలచుకొనగ ఆదుకొనుహస్తములను
వరదవచ్చి జనులకెల్ల వరములొసగునట!
జలవిలయము...వర్ణన...
ఆ.వె. జలము ప్రాణ ధార జనులకు యెంచగా,
కలము కత్తి యౌను కవుల యెదకు,
జలవిలయము కలుగగ,జాలి గొలుపగను..
ప్రజలు మౌను లయిరి పలుకు లేక!
వర్ణన....జలవిలయము....22-08-2018...డా.శ్యామల..
తెలుగు సాహిత్య సుధాంబుధి....వారు ఇచ్చిన దత్తపది...
దత్తపది...గంగ, యమున, గోదావరి, కృష్ణ ...
22-08-2018...రచన, డా.శ్యామల గడ్డం...
దత్తపది....
తే.గీ. భవుని కృప చేత దిగినది భవ్య గంగ
యముని చెల్లెలై అలరారి యమున వెలసె..
నాసికమ్ము గోదావరి నామ పుట్టె
పంట లొసగగ కృష్ణమ్మ పరుగులిడెను..!
డా.శ్యామల...22-08-2018...
చిత్రానికి గజల్ రచన- చిరు యత్నం..06-07-2018...
++++++++++++++++++++++++
అరమోముతొ చందురునీ హాసములో చూపుదువే...
ముద్రలతో ఆంగికములు ,అభినయములు చూపుదువే..
రంగస్థలమున రాగిణిగ హొయలెన్నో కురిపించీ...
అవని పైన అప్సరసా...అతిశయములు చూపుదువే....
నటరాజు ను మెప్పించీ మోక్షమునే కోరుదువో..
సిరిమువ్వలు ఘల్లుమనగ సందడులూ చూపుదువే...
రంభ ఊర్వశి మేనక లు నీముందూ బలాదూరె...
రసానందము గొలుపగ , లలిత కళలు చూపుదువే.
శ్యాముమురళి విన్నంతనె నాగిని వలె ఆడుదువే...
సరిగమలకు సానపెట్ట సంగతులూ చూపుదువే...
డా.శ్యామలగడ్డం...06-07-2018
గజల్ సదస్సు సమీక్ష...విమర్శ.....
డా. శ్యామలగడ్డం....21_06_2018....
±++++++++++++++++++++
జూన్...అంటే ఈ నెల 10, 11 తేదీలలో విజయవాడ లయోలా కాలేజీలో, కళాభారతి ఆవరణలో ఆంధ్రప్రదేశ్
ప్రభుత్వ సంస్కృతి సృజనాత్మక సంస్థ, మరియు జ్యోతిర్మయి తెలుగు గజల్ అకాడమి సంయుక్త ఆధ్వర్యంలో గజల్ సదస్సు జరిగింది.
తెలుగు గజల్ అంటేనే తెలుగు సాహిత్య ప్రక్రియగా తెలియనట్లు భావించేవారికి ఈ సదస్సు విషయం ఆశ్చర్యంగా ఉండొచ్చు.....కానీ తెలుగు గజల్ ప్రచారం వ్యాప్తిని తమ భుజస్కంధాలపై వేసుకున్న జ్యోట్గాకు మాత్రం ఇది కొత్త కాదు....దీనికోసం ఆంధ్ర.ప్ర.ప్రభుత్వాన్ని ఒప్పించి సహకరించేలా చేయడమే జ్యోట్గా సాధించిన మొదటి విజయం....
గజల్ అంటే తెలంగాణ లో ఉర్దూ సాహిత్య వాసన కలిగిన వారికి తెలుసు కానీ, ఆంధ్రాలో తెలిసినవాళ్ళు తక్కువే అనుకుంటున్నాను...ఆ తక్కువైనా...ఆవిధంగా తెలిసేలా చేసినవారిలో జ్యోతిర్మయి ఒకరు...గజల్ గాయనిగా, అన్నిచోట్లా ప్రదర్శనలిస్తూ,గజల్ పై సరియైన అవగాహన కల్పించడానికి సదస్సు తో సన్నధ్ధులయ్యారు...
ఒక చిన్న కార్యక్రమం తలపెట్టాలంటేనే ఎంతోమంది సహాయసహకారాలు అవసరమవుతాయి...
జ్యోట్గా సభ్యులు సహకారంతో , మరికొంతమంది సభ్యులతో ఈ కార్యక్రమం చేపట్టి విజయం సాధించారని చెప్పవచ్చు......
ఇక సదస్సు విషయానికి వస్తే....
ప్రారంభోత్సవం 10 వ తేదీన ఉదయం 11 గంటలకు సదస్సు ప్రారంభమయ్యింది... సాంస్కృతిక శాఖ డైరెక్టర్ శ్రీ విజయభాస్కర్ గారు ముఖ్య అతిథిగా, తక్కువ సమయంలో నే ఉపన్యాసాలు ముగిసాయి... జ్యోతిర్మయి గారు,పెద్దలకు, ఎంతో దూరాలనుండి వచ్చిన సభ్యులకు
స్వాగతాంజలి సమర్పించారు..సదస్సు ఉద్దేశ్యము, లక్ష్యము తెలిపారు..సదస్సు కార్యదర్శి అబ్దుల్ వాహెద్ గారు కూడా సదస్సు గురించి తెలియచేసారు...
తరువాత వేరే హాల్ లో సదస్సు విభాగాలు మొదలయ్యాయి... జ్యోతిర్మయి గారు సభ్యులందరినీ శ్రీ రెంటాల శ్రీ వెంకటేశ్వర్ రావు గారికి పరిచయం చేసారు..
సభ్యులందరూ.. దాదాపు బాధ్యతాయుతమైన ఉద్యోగాలను నిర్వహిస్తూ , అచ్చంగా గజల్ గురించి ఆసక్తితో తెలుసుకోవాలని వచ్చినవారే....
మొదటి ప్రసంగం...రెంటాలవారిది...గజల్ స్వరూపం..
గజల్ అంటే యేమిటి, రూపం ఏమిటి, సారం ఏమిటి?
రదీఫ్, ఖాఫియా అంటే ఏమిటి? నిర్మాణం ఎలా ఉండాలి..గతులు ఏమిటి....మిత్రా, మక్తా, తకల్లుస్..గురించి సవివరంగా చెప్పారు...
తరువాత సెషన్ లో గజల్ చరిత్ర, గానయోగ్యత
గురించి పత్తిపాక మోహన్ గారు చెప్పారు....పార్టీ నుండి, అరబ్బీ నుండి, ఉర్దూ నుండి తెలుగులోకి గజల్ ప్రయాణాన్ని ప్రస్తావించారు......
ఉర్దూ గజళ్ళ మాధుర్యాన్ని, లాలిత్యాన్ని..సులలితమైన పదజాలంతో వివరించారు.అంతేకాకఉర్దూ గజల్ ఛందస్సును , దాని సౌలభ్యాన్ని చెప్పారు.తెలుగులో ఛందస్సు పరంగా కొంత వెసులుబాటు తగ్గుతుంది అన్నారు..దానికి కారణం,మంచి తెలుగు అజంత భాష కావడమే..అన్నారు...మధురమైన ఉర్దూ గజల్స్ ని వినిపించారు....
10వతేదీ రాత్రి 13 మందితో గజల్ ముషాయిరా, ప్రారంభ సభ జరిగిన వేదికపైన అత్యంత ఆనందంగా జరిగింది...
ముషాయిరాను చూసి . ప్రేక్షకులు కూడా ఆనందాన్ని అనుభవించారు....
11 వ తేదీన గజల్ గానయోగ్యత- చమత్కారం అన్ని అంశంపై మాట్లాడవలసిన పెన్నా శివరామకృష్ణ గారు ఆరోగ్యరీత్యా రానందువలన ఆ విషయంపై రెంటాల మాష్టారు మాట్లాడారు....గజల్ పుస్తకాల్లోనుండి ఉదాహరణలు చూపి మరీ ప్రసంగాన్ని కొనసాగించారు...
ఉర్దూ గజళ్ళ లోని చమత్కారాన్ని చెప్పారు..ఉర్దూ రాదంటూనే....
తరువాత సెషన్ లో ఎండ్లూరి సుధాకర్ గారు నవీన తెలుగు గజల్ గురించి మాట్లాడారు...సభ్యులంతా
తమను తాము మరచిపోయి, ఏ ఒక్క విషయమైనా మనం మిస్ అవుతామేమో అన్నంత శ్రద్ధగా విన్నారు(ము) ...
గమ్మత్తయిన విషయమేమిటంటే...వారు స్వయంగా వారి అనుభవాలు చెబుతుంటే....గజల్ విషయంపైనే మాట్లాడుతున్నారా...లేదా...అనే విషయాన్ని కూడా మరిచిపోయారు సభ్యులు .....అపరిమితమైన వాగ్ధాటి...
ఇన్ని విషయాలు ఎలా గుర్తున్నాయబ్బా! అనిపిస్తుంది....
రెంటాల మాస్టారి వినయం, విషయంపై పట్టు, తనకేెమీ తెలియదంటూనే గజల్ సముద్రంలోని ఆణి ముత్యాలు అందించారు.....
సుధాకర్ గారి ప్రసంగంతో గుండెనిండా సంతృప్తిని, సంతోషాన్ని నింపుకుని హాల్ బయటకు వచ్చాము....
ప్రసంగాలు మధ్యలో చల్లాగారి, చల్లా గజళ్ళు గురించి
వాహెద్ గారి మత్తకోకిల గురించి, రెంటాల గారి మంత్రశాల గురించి, ఎం.బి.డి.శ్యామల గారి ఆలాపన పుస్తకం గురించి
పెన్నా గారి సల్లాపం గురించి గజల్ పుస్తక సమీక్షలు జరిగాయి....అందరూ బాగా చెప్పారు...
ముగింపు కార్యక్రమాలను మొదటి సభావేదిక పైన చిరుజల్లుల పరీమళాలతో ఆనందంగా జరిగింది...
గజల్ గుల్దస్తా..50 మంది గజల్ కవులు రాసిన సంకలనం
సాంస్కృతిక శాఖ డైరెక్టర్ శ్రీ విజయభాస్కర్ గారి చేతులమీదుగా ఆవిష్కరింపబడింది...ప్రతీ ఒక్కరికీ సన్మానం జరిగింది...గజల్ రచనా పోటీలో విజేతలయినవారికి బహుమతులు ఇచ్చారు..శీర్షిక పోటీలో గెలుపొందిన వారికి బహుమతి ఇచ్చారు.....అందరూ చిరునవ్వులతో,గుండెనిండా సంతోషాన్ని నింపుకొని, స్నేహితులతో వీడ్కోలు తీసుకుని ఎవరి గూటికి వారు చేరారు...
గజల్ రచన వ్యాప్తి చెందాలంటే..నా అభిప్రాయం..
మనం రాసిన గజల్ గాయనీ, గాయకులు ఆలపిస్తేనే
రచనకు గుర్తింపు వస్తుంది.లేదంటే గజల్ కవులు మాత్రమే చదువుతారు.
50 మంది గజల్ షేర్లలో ఒక్కొక్క షేర్ తీసుకుని గాయకులు ఆలపించాలి, కచేరీలలో...
గాయనీ గాయకులు కూడా రాసేవారితో పాటు ఎక్కువ మంది రావాల్సి ఉంది...
ముషాయిరాలు నడుపుతూ నే ఉండాలి.....
++++++++++++++++
చివరగా చిన్నమాట....ఎంతో దూరాల్నుండి సదస్సు కోసం వచ్చినవారిని , వారి పరిచయాన్ని వారు చేసుకునే అవకాశం ఇవ్వాలి...
సదస్సు చివరన సదస్సు పట్ల సభ్యుల మనోగతాన్ని సభలో వివరించే (అది ఒక రెండు నిమిషాలు అయినాసరే) అవకాశాన్ని అందివ్వాలి.....
ఇవి నాకు వ్యక్తిగత అభిప్రాయాలు.....
వసతి, భోజనం సౌకర్యాలు చాలా బావున్నాయి...
ఇంత పెద్ద కార్యక్రమాన్ని తలకెత్తుకుని సక్రమంగా నడిపిన
స్నేహితురాలు జ్యోతిర్మయి మళ్ళ గారికి హృదయ పూర్వక నమస్సలతో, మరొక సదస్సుకు ఆశగా ఎదురు చూస్తూ...
..............
సమీక్ష ఆలస్యంగా రాసినందుకు మన్నించమంటూ....
మీ
మిత్రురాలు,
డా.శ్యామల గడ్డం.......
21-06-2018...
"న్యాయమా"...గజల్....గజల్ రచన...
డా.శ్యామల గడ్డం.....18-06-2018....
ప్రేమ తడిసిన మనసునందున విషము చిమ్ముట న్యాయమౌనా...
వలపు తలపను(తలపు+ అను) నావ నీటను ముంచివేయుట న్యాయమౌనా...
ఎన్నడో ఒక చూపు బాణం విసిరి వేస్తివి ప్రేమ మీరగ.
నిన్న నే ఒక తేనె కత్తిని మదిని దింపుట న్యాయమౌనా..
మూసివేసిన రెప్పవెనుకా ద్వేషమెందుకు రగిలిపోయెను..
గజల్ ముషాయిరా......రచన..డా.శ్యామల గడ్డం.....30-05-2018..
+++++++++++++++++++++++++++++++++
కలలోన నీ రూపె కదులుతూ ఉంటుంది..
మంత్రమై నీపేరు నిలుస్తూ ఉంటుంది,...
నీ ఊహ క్షణమైన కలిగితే చాలులే..
నా మనసు జడముగా మారుతూ ఉంటుంది....
నీ కనుల భాష్యాలు చదివితే చాలులే..
నా హృదయ రాగమూ పలుకుతూ ఉంటుంది..
ఆమనీ కోయిలా పాడితే తీయగా,
నీ గీత మాధురీ తడుముతూ ఉంటుంది..
నీ వలపు తలపులే తలుపులే తీయగా..
మాటలే కవితయై పారుతూ ఉంటుంది..
విరహాగ్ని పొగలోన నీ రూపె కనబడదు.
ప్రేమతో వర్షించ తొలగుతూ (పొగ)ఉంటుంది...
డా.శ్యామల గడ్డం.....30-05-2018
గజల్ సమూహ సభ్యులకు గజల్ ప్రేమా కవులకు శుభము మధ్యాహ్నం....
గతవారం అంటే 27-04-2018 గజల్ కాన్వాస్ శీర్షిక లో ఇచ్చిన చిత్రానికి అద్భుతమైన స్పందన వచ్చింది. మది గదిలో దాచుకోదగిన గజల్స్ ఎన్నో గజల్ కవిమిత్రుల కలాలనుండి జాలువారాయి...అందరికీ ధన్యవాదాలు..
సమీక్ష.
++++++++
చిత్రం అమ్మ బొమ్మ..అమ్మ చెంత పాపాయి...ఇక షేర్ల వరదకు అడ్డేంటీ....అమ్మ ప్రేమ కొనలేనిది, అనంతమైనది..
అపూర్వమైన ది.అసాధారణమైనది. ప్రతీ తల్లి నాకు నా బిడ్డపై ఉన్నప్రేమ మరి ఎవ్వరికీ ఉండదు.అనుకుంటుంది..ఇంతకుముందెప్పుడూ వేరెవరూ ఈ ప్రేమను చూపలేదు. అనుకుంటుంది.
ఈ శీర్షికలో మొదటి గజల్ సత్యవేణి పసుపులేటి గారిది.
"బోసిబోసి నువ్వులతో అలరించే అనుబంధం..
జీవితమే అందంగా విరిసేనూ మధురంగా..."
అంటూ పాపాయి బోసినవ్వులను విరబూయించారు.మధురమైన గజల్...
సీనియర్ కవయిత్రి వాణీ వెంకట్..షేర్లు ఏవి బాగున్నాయని చెప్పాలి..ప్రతీ షేర్ తో మనం తాదాత్మ్యం చెందుతాం.
"అమ్మంత నీదనీ. అణువణువూ అల్లుకుని
తనువంత ప్రేమగా తాకుతూ ఉంటావు.."
ఓహ్! ఎంతో బాగుంది...తల్లి బిడ్డ ప్రేమను ఇంత గొప్పగా ఊహించుకోవడం అద్భుతం...
మరొక సీనియర్ గజల్ కవయిత్రి ఉమాదేవి ప్రసాదరావు జంధ్యాల గారు.సందర్భానుసారం సరదా పేర్లను గజల్ లో గుప్పించడం వీరి ప్రత్యేకత..
చిత్రానికి తగినట్లు ...
" ఉంగాల కబురులే చెప్పరా తండ్రీ...
వాటిలో అర్దాలే విప్పరా తండ్రీ..."
అంటూ.
" కృష్ణ కృష్ణ అంటూ భజన వినగా..
లేలేత చప్పట్లు కొట్టారా తండ్రీ.."
చప్పట్లు కొడుతున్న పిల్లవాడిని కళ్ళముందుంచారు..
అవలీలగా పద్యం గజల్ కవిత. యేదైనా 2 నిముషాల్లో రాయగలిగిన కవి రుద్రారం శ్రీనివాస్ రెడ్డి గారు...
ఈ చిత్రం ఆధారంగా మంచి సందేశాన్ని మంచిమాటలు అమ్మ పరంగా చెప్పినందుకు ధన్యవాదాలు....
"నడక నేర్పి నడత నేర్పి జీవితాన కాంతి నిలుపు..
కన్నతల్లి కన్న మిన్న భాగ్యమే ది లోకంలో" ..
అంటూ తల్లిపై ప్రేమను పంచుకున్నారు..
ఎంతో ఉత్సాహంగా చిన్నవాళ్ళతో సమానంగా గజల్స్ రాస్తూ గజల్ సాహిత్యాభివృధ్ధిలో పాలుపంచుకుంటున్న కవయిత్రి. నేదునూరి రాజేశ్వరి గారు...
మచ్చుకు ఒక షేర్...
ముత్తెములే మూటగట్టి మురిపించే నీ నవ్వులె
ఎదపొంగులు తాళలేని లేతకొమ్మనైతినేను....
అని గొప్పభావాన్ని వెలిబుచ్చారు...
ఇంకా ...
రారాజువు నీవైతే. రాజు అమ్మ నైతినేను....అనికూడా అంటారు...ఇది చాలా నచ్చింది..
సుబ్రమణ్య శర్మగారు...మంచి పషేర్లను అందించారు . అన్ని కాలంలోనే గజల్ ఫార్మెట్ ని అర్ధం చేసుకుని ఎంతో ఉత్సాహంగా గజల్స్ రాస్తున్న వారికి ధన్యవాదాలు....
"అందరిలో నువ్వున్నా "నా కొడుకే" అని మురిసే.
మనసులోని తల్లి ప్రేమ గొప్పతనం తెలుసుకో..."
నిజంగా ఇది నిజం...ప్రతీ తల్లి తన కుమారుడు ప్రత్యేకం అనుకుంటుంది...మంచి షేర్స్ రాసిన శర్మగారికి ధన్యవాదాలు....
శైలజ ఆకుండి గారు కూడా వేగంగా గజల్ మూలాన్ని పట్టుకుని గజల్స్ రాస్తున్న కవయిత్రి. అమ్మ గజల్ అద్భుతంగా రాసారు...
"బ్రహ్మ కొంతైనా చెప్పలేని భాషలోన పలుకుతుంటె.
అమ్మకన్ని తెలుసుననీ చెప్పాలని ఉన్నది లే...."
కాలమంత నీతోనె గడపాలని ఉన్నదిలే
నా బాల్యౌ నీలోనే చూడాలని ఉన్నది లే...
అని మంచి భావమున్నషేర్స్ రాసినందుకు శైలజ గారికి ధన్యవాదాలు...
చిత్రం బాగా నచ్చిందేమో! శైలజ గారికి..మరొక అందమైన గజల్ కూడా రాసారు.
పుత్రుడైన ను, పుత్రికైనను ఒక్కరీతిగ ముద్దుజేయుచు.
కుప్పతొట్టెల విసిరివేయని నేటి అమ్మకు వందనం..
అంటూ, అమ్మాయినీ ,అబ్బాయినీ ఒకే తీరుగా భావించే
తల్లికి నమస్కారం చేస్తూ, కుప్పతొట్టెలొ ఆడపిల్లను వేయని తల్లికి వందనం చేస్తోంది శైలజ....
ఈ విధంగా ఈ వారం గజల్ కాన్వాస్ శీర్షిక సాగింది..
ముషాయిరాలో పాల్గొనే గజల్ కవులందరూ గజల్ కాన్వాస్ శీర్షిక కి కూడా రాయవలసిందిగా కోరుతున్నాను...
ఈ శీర్షిక నిర్వహించడానికి అవకాశం ఇచ్చిన జ్యోతిర్మయి గారికి ధన్యవాదాలతో, గజల్ మిత్రులందరికీ శుభాకాంక్షలతో...
మీ
శ్యామల గడ్డం......02-05-2018...
ముషాయిరా గజల్......
శ్యామ మనసులొ వెన్నెలుంటే తిమిరమంతా చెదరిపోదా...
గతముగాయమె తెలుసుకుంటే వేదనంతా చెదిరిపోదా...
1.బాధలన్నో మదినినిండగ బాల్యమంతా గురుతు రాదా....
చెంతచేరే మనిషి ఉంటే తిమిరమంతా చెదరిపోదా..
2. వసంతుడే తోడు రాగా పిల్లగాలికి ఆటవిడుపు...
మగువ మనసున గూడు కట్టిన వేదనంతా చెదిరిపోదా...
3.ఆడపిల్లలు ఆదిలక్ష్ములె అవనికంతా వెలుగుదివ్వెలు.
నిండు వెన్నెల పరచినంతా శోకమంతా చెదిరిపోదా...
4. అక్షయముగా భాషవుండగ ఆంగ్లమెందుకు శుధ్ధదండగ...
తెలుగువెలుగుల జిలుగు చూపగ భ్రాంతిఅంతా చెదిరిపోదా...
5..మనసు వీడని మౌనవీణే .హృదయ ద్వారము మూసివేయగ..
.రెప్పదాటిన కంటనీటికి చెక్కిలంతా చెదరిపోదా..
6. చిన్నపిల్లను కరుణ లేకయె చిదిమి వేసిరి మృగమదాంధులు..
మనుషులంతా ఒక్కటైతే దుష్టత్వమంత చెదరిపోదా!
7. ధనముమదమూ మనిషి చేరిన కళ్ళపొరలూ కమ్మునెపుడూ..
మానవత్వమె మంటకలిసిన బంధమంతా చెదరిపోదా...
8. నీటిచుక్కే లేకపోతే మనిషి మనుగడ ప్రశ్నయే మరి...
వానదేవుడి కరుణఉంటే కరువు అంతా చెదరిపోదా...
9. కొమ్మకొమ్మకు కోయిలమ్మా పాటపాడగ మధురమౌనూ..
మావిచిగురూ లేకయున్నా గానమంతా చెదరిపోదా.
గజల్ రచనా.......
డా.శ్యామల గడ్డం....19-04-2018
ముషాయిరా... తెలుగు గజల్...04-04-2018..
+++++++++++++++++++++++
అక్షరాలు అనంతమూ ఆపలేరు ఎవరైనా
శ్యామమనసు స్వచ్చమనీ తెలియలేరు ఎవరైనా
రవికిరణం సోకినంత పంకజానికెంత సొగసొ!
కవిత సొంపు లేకుండా మెచ్చలేరు ఎవరైనా...
నింగి అంచు నున్న చుక్క రాలిపోక ఆగదులే..
కడలి నున్న అలలపొంగు ఆపలేరు ఎవరైనా..
మంచి యున్న చాలదులే మాటయున్న సరియేగా..
శక్తియుక్తు లున్నగాని గెలవలేరు ఎవరైనా..
గుండెల్లో బడబాగ్నులు ఎన్నున్నా ఎంచలేవు....
కళ్ళ వెనుక సంద్రాలను దాచలేరు ఎవరైనా
శ్యామల గడ్డం...04-04-2018
తెలుగు గజల్....డా.శ్యామలగడ్డం..27-03-2018
చిన్ననాటి చెలిమిని నే పంచాలని ఉన్నదిలే..
మమతలతో మారాకులు తొడగాలని ఉన్నదిలే..
చిరునవ్వుల చిరుజల్లులొ తడవడమే ఆనందము..
మనసు విప్పి మదికోరిక చెప్పాలని ఉన్నదిలే. ..
కన్నులలో కరిగిపోని సముద్రాలు యెన్నున్నా..
చెక్కిలిపై రానీయక గెలవాలని ఉన్నదిలే
ఊహలలో చిత్తరువును చిత్రించిన చాలదుగా..
కాగితమున కవిత్వమై మెరవాలని ఉన్నదిలే..
మరచిపోని మరువలేని మదిగాయాలెన్నెన్నో..
.ప్రేమయనే
లేపనమును పూయాలని ఉన్నదిలే
.....
డా.శ్యామలగడ్డం...28-03-2018...
మల్లెల నవ్వుల పువ్వులు విరియుట
మాటల దండలు అవసరమేగా
చెలిమిని చూపే చెలియ కరుణలూ,
కలిమికి దారులు, అవసరమేగా
సంద్రపు అలలూ నింగిని తాకగ.
నల్లని మేఘము భళ్ళున కురిసెను.
కన్నియ మనసున కడలియె నిలువగ.
కంటికి ధారలు అవసరమేగా....
తూరుపు కనుమల కెంజాయలతో
వెలుగులు నింపగ తపనుడు వచ్చెను.
తామర బుగ్గల సిగ్గులు పూయగ
తడబడు అడుగులు అవసరమేగా...
మనసున దాగిన ఆశల వల్లరి
తలచిన ఎత్తుకు ఎగబాకేనా....
గమ్యం చేరగ గమనము, లక్ష్యము ,
తపనలు, పరుగులు అవసరమేగా....
కలిసిన మనసుల కథలతొ, సొదలతొ
రాగం రవళులు వినిపించేదా...
కలవని మతముల , కులముల గొడవలు
మరచిన మమతలు అవసరమేగా....
ఆకస మేలే రాజుని చేరగ
తారలు కదలగ తపనలు ఎన్నో...
చుక్కలు పక్కలు పరచిన వైనం,
జిలుగు వెలుగులూ అవసరమేగా..
డా.శ్యామలగడ్డం..20-03-2018...
విరహాలను అగ్గిపూలు వెదజల్లకె నా ప్రేయసి
ప్రణయాలను రాగమాల మెడనేయవె నా ప్రేయసి
ఉషోదయపు రవి కాంతుల నీ తనువే మెరసిపోగ
ఉదయించిన జాబిల్లే నీ వదనమె నా ప్రేయసి
కమ్మనైన పికముపాట నీ గళమై వినిపించగ
మదినుండే మమతలేమొ పొంగి పొరలె నా ప్రేయసి
కొండ కోన శబ్దించగ నీ పలుకులె అనుకున్నా
సెలయేరుగ నీ నవ్వే భ్రమియించితె నా ప్రేయసి
కరి మబ్బుల దారివెంట భ్రమరములే వరుస కట్ట
నీలిమబ్బు చాటుకురులు దరిశించితె నా ప్రేయసి...
డా. శ్యామల గడ్డం....02-01-2016
